Presidenti i Federatës Shqiptare të Futbollit, Armando Duka e ka quajtur ndeshjen me Serbinë si një ndeshje me rëndësi edhe për objektivin sportiv.
Në studion e emisionit “Opinion”, Duka thekson se shancet për të arritur në vendin e dytë janë mes nesh dhe Serbisë dhe kjo e kthen më shumë këtë ndeshje në një derbi sportiv.
“Për tu kthyer tek ndeshja e tanishme me Serbinë është një ndeshje e rëndësishme për objektivin sportiv. Edhe për të gjithë ata që e mbështesin dhe duan Kombëtaren kështu duhet ta mbështesin që ne kemi objektiv dhe shpresë që të shkojmë ne Play Off, sepse vendi i parë në këtë grup është shumë i vështirë dhe pothuajse i pamundur.
Shancet për të arritur në vendin e dytë janë mes nesh dhe Serbisë dhe kjo e kthen më shumë këtë ndeshje në një derbi sportiv. Është ndeshje realisht e vështirë si ndeshje futbolli përveç ngarkesave të tjera”, u shpreh Duka.
Sa i takon Kombëtares serbe, Duka shprehet se është një skuadër me kualitet dhe traditë sportive. Duka theksoi edhe faktin që Kombëtarja jonë është një skuadër kompakte dhe me një mbështetje të madhe.
“Serbia ka kualitete, traditë sportive, shkollë të mirë futbolli, individë të mirë dhe kjo ëhstë ajo që na bën të mendojmë që ne i kemi mundësitë për të arritur rezultat sepse mendojmë se kemi një skuadër më kompakte më e lidhur me fanelën dhe interesimi në shkallët e stadiumit është shumë më i madh se në Serbi. Këto na bëjnë të mendojmë se ne mund të shkojmë në një rezultat pozitiv vetëm duke gjetur balancat pozitive”, theksoi Presidenti Duka.
Duka ka pasur një mesazh për futbollistët si dhe trajnerin e Kombëtares sa i takon ndeshjes shumë të rëndësishme me Serbinë.
“Kjo ndeshje nuk ka më nevojë për motivim, por duhet të gjejnë balancat dhe le të themi motivimin optimal për të marrë maksimumin.E njëjta gjë (edhe për trajnerin). I kam thënë që ne duhet ta pregatisim dhe ta jetojmë si një ndeshje futbolli, kundër një kundërshtari me kualitet që ne duam t’i marrim fitoren dhe t’i marrim fitoren”, theksoi Duka.
Sa i takon vështirësisë mes ndeshjeve, Duka ka cilësuar më të vështirë ndeshjen që do të luhet të shtunën 7 qershor, se sa ajo e kthimit në Serbi.
“Mua më duket më e vështirë këtu. Presioni më i madh është këtu sepse jashtë fushës është cik më ndryshe dhe faktikisht eksperienca ka treguar se jashtë fushës kemi bërë ndeshje të mira”, është shprehur Duka./tvklan
