Kombëtarja vijoi me përgatitjet për ndeshjen me Anglinë edhe këtë të martë. Trajneri Sylvinho i pati të gjithë në dispozicion në dallim nga një ditë më parë.
Në seancën e pasdites pati ngarkesë të plotë dhe u aplikuan edhe ushtrime taktike, por edhe në palestër.
Kuqezinjtë do të zhvillojnë edhe një tjetër stërvitje të mërkurën paradite për t’u nisur më pas drejt Londrës ku do të vijojnë përgatitjet.
Atmosfera është e mirë me synimin për të arritur rezultat ndaj përfaqësueses angleze. Mes mungesave të rëndësishme në këtë sfidë është mbrojtësi i krahut të majtë Mario Mitaj, i cili pati një ndërhyrje te muskujt e barkut që e shqetësonin prej kohësh.
Operacioni u krye në Londër dhe rehabilitimi do të nisë në Athinë për ta mbyllur në klinikën e Al Itihadit. Klubi arab nuk bëri të ditur datën e kthimit të Mitajt.
Tv Klan
