Kur na ndajnë pak ditë nga sfida e Kombëtares Shqiptare me Serbinë, emocionet e futbollistëve dhe tifozëve duket se janë në rritje.
I ftuar mbrëmjen e sotme në emisionin “Opinion” në Tv Klan për të folur për këtë sfidë, ishte presidenti i Federatës Shqiptare të Futbollit, Armand Duka.
Duke marrë parasysh historikun me Serbinë, Duka shprehet se kjo është vetëm një ndeshje futbolli, e si e tillë duhet performuar.
“Gjithë çunat janë të ndërgjegjshëm që kjo është një ndeshje futbolli. Ne duhet ta luajmë, ta performojmë si një ndeshje futbolli, e ta fitojmë si të tillë. Nëse ne arrijmë ta fitojmë këtë, kemi arritur shumë gjëra të tjera”, tha Duka.
I pyetur nga drejtuesi i emisionit, Blendi Fevziu, nëse trajneri i Kombëtar, Silvinjo, është i vetëdijshëm për tensionet e kësaj ndeshjeje, Duka shprehet se ai e njeh historinë dhe në një farë mënyre dhe ai e përjeton së bashku me shqiptarët emocionet.
“Silvinjo e njeh historinë e Shqipërisë, e njeh mentalitetin e shqiptarëve. Jeton me këtë mentalitet. Edhe ka lexuar, e ka biseduar me ne përgjatë gjithë kësaj kohe. E përjeton në një farë mënyre, ndoshta jo njësoj si ne, mbase jo njësoj si futbollistët me origjinë nga Kosova, por, e njeh realitetin”, tha Duka.
