Partia Demokratike ka publikuar sot përgjigjen e Ministres së Kulturës Mirela Kumbaro, e cila e thirrur në Komisionin Parlamentar për Edukimin lidhur me cështjen e Teatrit Kombëtar, kthen përgjigje zyrtarisht se nuk mund të jetë e pranishme aty.
Kumbaro shprehet se arsyeja e mosparaqitjes së saj të hënë në mbledhjen e komisionit, do të jetë axhenda e angazhuar më parë.
Ndërkohë, në publikimin e saj PD shprehet se:
“ Kjo është e disata herë që ministrja refuzon Parlamentin kur duhet të japë llogari për projektligjin për shembjen e Teatrit Kombëtar dhe grabitjes së pronës publike në favor të një firme private të lidhur me Ramën dhe Velaij. Ministrja Kumbaro është nismëtare e këtij projekligji, por që ende nuk ka dhënë asnjë llogari për të. Herën e fundit ajo vendosi të shoqërojë Erion Veliajn dhe të braktisë seancën dëgjimore për ligjin e posaçëm antikushtetues për Teatrin. Deri tani Mirela Kumbaro nuk ka asnjë prononcim për këtë çështje”.
