Ministri i Turizmit dhe Mjedisit, Blendi Klosi ka deklaruar të enjten se ka një deforimim të koordinatave për ndërtimin e HEC-eve në Kanionet e Osumit, ku për rrjedhojë rrezikohet edhe shkatërrimi i tre ujëvarave.
Klosi tha në një lidhje telefonike për emisionin ‘Opinion’ në TV Klan se koordinatat e dhëna për lejen mjedisore janë të keqtrajtuara dhe në atë pikë nuk ka asnjë shans që ai HEC të ndërtohet.
Klosi: Historia është ndërtuar mbi një gënjeshtër, koordinatat e dhëna në lejen mjedisore janë të keqtrajtuara. Prandaj po ju them se kjo histori nuk mund të zgjidhet me një emision, pasi kjo është një histori që ne kemi hapur një investigim. Jemi ne ata që kemi ngritur probleme dhe ashtu siç e ka thënë edhe Ministria e Energjitikës qartë, në momentin që bie leja për ndikimin në mjedis, të cilën ne do t’a rrëzojmë dhe kjo nuk diskutohet. Në atë vendim dhe në atë pikë nuk ka asnjë shans që ai HEC të ndërtohet.
Kanioni i Osumit
Kanioni ka një gjatësi prej 26 km dhe vetëm 13 km janë të shfrytëzueshme. Turistët vijnë për të bërë rafting, në këto 13 km shohin 8 ujëvara, 3 prej të cilave janë ato më të famshme e ku turistët harxhojnë më shumë kohë për të bërë foto. Ato janë ujëvara e Bigasit, ajo e të dashuruarve dhe ujëvara shampanjë.
Leja mjedisore
Gazetarja e emisionit ‘Opinion’, Manjola Bregasi bëri me dije se leja e mjedisore për ndërtimin e hidrocentraleve mbi Kanionet e Osumit është e pavlefshme sepse i ka kaluar afati. Bregasi tregoi se vlerësimi i ndikimit në mjedis për ndërtimin e dy hidrocentraleve, ose ndryshe leja mjedisore është miratuar nga Agjencia Kombëtare e Mjedisit në datën 26 mars të vitit 2015.
Pra, -sipas saj,- leja mjedisore ka patur afat deri në 26 mars të vitit 2017 dhe meqënëse deri në këtë datë ndërtimi i HEC-eve nuk ka filluar, kjo leje është bërë automatikisht e pavlefshme.
Shiko videon:
