Bashkimi Evropian thotë se çdo vendim për ndërtim urash mbi Ibër në Mitrovicë duhet të merret me përfshirjen e të gjitha komuniteteve atje.
Ndaj planeve të qeverisë së Kosovës reagon edhe Lista Serbe.
Qeveria e Kosovës synon të ndërtojë dy ura të reja në qytetin e Mitrovicës, që ndahet në pjesën veriore dhe atë jugore prej lumit Ibër.
Njoftimi për ndërtimin e dy urave të reja në të dy anët e urës kryesore mbi lumin Ibër, nxiti reagimin e Bashkimit Evropian dhe të partisë politike më të madhe të serbëve të Kosovës, Listës Serbe.
Ndërtimi i dy urave të reja mbi lumin Ibër është planifikuar në bazë të një memorandumi bashkëpunimi ndërmjet Ministrisë së Infrastrukturës së qeverisë së Kosovës dhe komunave të Mitrovicës së Veriut dhe asaj të Jugut, njoftoi ministri i Infrastrukturës, Liburn Aliu.
“Memorandumin e filluam me nënshkrimin e projektit të përbashkët të ndërtimit të dy urave të reja mbi lumin Ibër, projekte këto që do të lehtësojnë qarkullimin e qytetarëve të të dy komunave dhe do të shërbejnë si infrastrukturë në komunikimin dhe bashkëpunimin ndërmjet qytetarëve, duke forcuar integrimin social dhe zhvillimin ekonomik në të dy anët”, njoftoi ministri Aliu, duke publikuar edhe fotografi të nënshkrimit të memorandumit.
BE: Me kujdes dhe në mënyrë gjithëpërfshirëse
Por Bashkimi Evropian deklaroi se çdo vendim për çfarëdo ndërtimi përgjatë lumit Ibër, që e ndan Mitrovicën në jugun e banuar me shqiptarë dhe veriun e banuar me serbë, duhet të merret me kujdes dhe në mënyrë gjithëpërfshirëse, me përfshirjen e plotë të të gjitha komuniteteve të prekura.
“BE-ja nuk është në dijeni të këtij projekti dhe as nuk është e përfshirë në të”, tha një zëdhënës i BE-së.
Reagimi i Listës Serbe
I menjëhershëm ishte reagimi edhe i Listës Serbe, që është partia më e madhe e serbëve të Kosovës që gëzon mbështetjen e Beogradit zyrtar.
Ky subjekt politik, që është vazhdimisht kritik ndaj qeverisë së udhëhequr nga Albin Kurti, tha se “Kurti po e zbaton me shpejtësi dhe pa asnjë fshehje planin për spastrim etnik të popullit serb nga territori i Kosovës”.
Lëvizja Vetëvendosje, që udhëhiqet nga kryeministri në detyrë i Kosovës, Albin Kurti, publikoi një fotografi e cila tregon se si do të dukeshin këto dy ura. Siç shihet, urat e reja do të ndërtoheshin në anën e majtë dhe të djathtë të urës kryesore mbi lumin Ibër.
Simbol i ndarjes etnike në Mitrovicë
Ura kryesore mbi lumin Ibër, e cila që nga paslufta është bërë simbol i ndarjes etnike në Mitrovicë, është pjesë e marrëveshjes ndërmjet Kosovës dhe Serbisë për lirinë e lëvizjes dhe që është diskutuar vazhdimisht në kuadër të dialogut për normalizimin e marrëdhënieve.
Tani për tani ura kryesore mbi Ibër është e hapur vetëm për këmbësorët, nuk lejohen veturat dhe aty vazhdimisht patrullojnë forcat e KFOR-it.
Qeveria e Kosovës edhe në korrik të vitit të shkuar pati planifikuar të hapë për qarkullim edhe për veturat urën mbi lumin Ibër, por kjo pati shkaktuar tensione në Mitrovicë dhe reagime nga bashkësia ndërkombëtare.
Në atë kohë, misioni i KFOR-it, që u vendos me një prani më të shtuar mbi urë, pati thënë se “çdo vendim për hapjen e urës duhet të merret brenda kornizës së dialogut Kosovë–Serbi, i cili zhvillohet përmes Bashkimit Evropian”.
Edhe Bashkimi Evropian vitin e shkuar pati rikujtuar gjithashtu se çështja e hapjes së urës ishte temë e dialogut midis Kosovës dhe Serbisë për normalizimin e marrëdhënieve.
Dhe pikërisht për këtë arsye, sipas BE-së, të gjitha vendimet duhet të merren brenda dialogut me pjesëmarrjen e delegacioneve zyrtare të Prishtinës dhe Beogradit./DW
