Reperi i famshëm britanik, Cadet ka ndërruar jetë, pas një aksidenti me makinë, gjatë rrugës për në një koncert. Pavarësisht ndërhyrjes së ndihmës së shpejtë, reperi vdiq në vendin e ngjarjes, ndërsa dy persona të tjerë janë dërguar në “Royal Stoke University Hospital” me lëndime të rënda.
Lajmi i hidhur qarkullonte në rrjete sociale, por u zyrtariua nga familjarët e reperit nëpërmjet një postimi në llogarinë e tij zyrtare në “Instagram”.
“Ne, familja e Blaine Cameron Johnson, i njohur ndryshe si Cadet po ndajmë me ju një lajm të trishtuar. Gjatë orëve të parë të mëngjesit të 9 shkurtit Cadet ka vdekur”, shkruhet në njoftim.
Sipas “BBC” menaxheri i tij tha se 28-vjeçari ishte pasagjer në një taksi. Ai ishte rrugës për në “Keele University” aty ku do performonte.
Ndërkohë në rrjetet sociale, kolegët dhe fansat e reperit kanë shprehur ngushëllimet e tyre për ndarjen e parakohshme nga jeta!/E.M
