Koronavirusi i ka marrë jetën drejtorit të drejtorisë së punëtorëve në Bashkinë e Tiranës, Feti Fanaj.
Ai ndërroi jetë në një spital në Turqi në moshën 45-vjeçare ku ishte shtruar pasi ishte rënduar nga simptomat e COVID-19.
Prej më shumë se një muaji, Feti Fanaj kishte rezultuar pozitiv me koronavirus por as kurimi në spitalin Infektiv e as ai në Turqi nuk arriti ta shpëtonin.
Për lajmin e hidhur ka reaguar në Facebook, edhe kryebashkiaku i Tiranës, Erion Veliaj, i cili kujton punën e përditshme të bërë me pasion nga drejtori i punëtorëve.
“Fetiu ishte një mik ideal, një baba i jashtëzakonshëm i Mishelit të vogël. Nga ata njerëz punëtorë që i dha kaq shumë Tiranës, kuronte çdo ditë, me po të njëjtin pasion, çdo detaj të shkollave, kopshteve dhe çerdheve tona publike. I kudogjendur, i palodhur! U prehsh në paqe i dashur Feti, vëlla i pazëvendësueshëm për të gjithe ne! Ngushëllime Nidës së re e nënës së tij hallemadhe, që sapo humbi edhe të shoqin. Nuk do t’ju lëmë kurrë vetëm!”, shkruan Veliaj.
I shtruar në spital në Turqi, Fetiu as nuk e mori vesh që një javë para se ai të mbyllte sytë, babai i tij, ishte ndarë nga jeta po ashtu.
Ai la pas nënën, bashkëshorten dhe vajzën e tij të vogël që sot kanë marrë vesh me trishtim të madh lajmin e ndarjes së tij nga jeta. /Opinion.al
https://www.facebook.com/ErionVeliaj/posts/10158906805331926
