Pele, mbreti brazilian i futbollit i cili fitoi tre Kupat e Botës dhe u bë një nga figurat më të rëndësishme të sportit të shekullit të kaluar, ka ndërruar jetë të enjten.
Sipas Associated Press, Pele u nda nga jeta në moshën 82 vjeçare. Agjenti i tij, Joe Fraga, konfirmoi vdekjen e tij: “Mbreti ka vdekur”-tha ai.
Pele i ishte nënshtruar trajtimit për kancerin e zorrës së trashë që nga viti 2021, ndërsa prej një muaji ishte i shtruar në një spital në Sao Paulo, Brazil.
Vajza e tij Kely Nascimento pas ndarjes nga jeta të legjendës së futbollit shkroi në Instagram “Të duam pafund. Pusho në paqe.”
I konsideruar gjerësisht si një nga lojtarët më të mëdhenj të futbollit, Pelé kaloi gati dy dekada duke magjepsur tifozët dhe kundërshtarët si golashënuesi më i mirë me klubin brazilian Santos dhe ekipin kombëtar të Brazilit.
