Pas shuarjes së zjarrit në fushën e mbetjeve në Fier, së fundi është ndaluar edhe tymi që dilte prej tyre, duke i dhënë fund kështu masakrës ekologjike që jetoi ky qytet prej disa ditësh. Pavarësisht se qyteti tashmë kishte një incinerator, mbetjet vijonin të depozitoheshin në fushë, ndërsa është e paqartë se si ato u ndezën.
“Fusha e mbetjeve është vënë në kontroll të plotë. Pra, nëse para 2-3 ditësh pamë që nuk kishte më flakë, por vetëm tym, sot vemë re se nuk ka asgjë, pra 100% nuk ka as tym, as gjë”, tha kryetari i Bashkisë së Fierit, Armando Subashi.
Ai shtoi se mbetjet tashmë do të shkojnë në incinerator, ndërsa dy ditë më parë bëri me dije se kjo vonesë kishte ardhur për shkak të mungesës së rrugëve deri atje.
“Të gjitha mbetjet që mblidhen në Bashkinë e Fierit do të shkojnë tek inceneratori pastaj për të vijuar me trajtimin tjetër, u shpreh Subashi./Opinion.al
