Presidenti i SHBA Donald Trump ka paditur për shpifje një nga gazetat më të mëdha në SHBA, “The New York Times”. Vendimi i Trump vjen pas publikimit të një artikulli, i cili sipas tij është me opinione false , ku thuhej se Rusia dhe SHBA kanë bashkëpunuar gjatë fushatës për garën presidenciale të vitit 2016.
Teksa Trump vijon garën e tij brenda republikanëve për një mandat të dytë në krye të Shtëpisë së Bardhë, drejtuesit e fushatës thanë se tashmë padia është depozituar në gjykatën e New York.
Trump tha se “New York Times” ka gabuar shumë herë në këto vitet e fundit dhe tashmë do t’i hapë rrugë gjykatës për të vendosur për vërtetësinë e lajmeve që e përditshmja ka publikuar, kryesisht në lidhje me Rusinë dhe ndërhyrjen në zgjedhjet e shkuara presidenciale.
Artikulli në fjalë daton më 27 mars të vitit 2019, ku “New York Times” ka publikuar një opinion të Max Frankel, i cili ka shërbyer si redaktor në këtë gazetë nga viti 1986 deri në ’94./ Opinion.al
