Policia e Shteti njoftoi sot arrestimin e 30 personave në kuadër të operacionit “Mezhgorani” ndër të cilët ishte dhe gazetari dhe botuesi, Henri Çili.
Ai akuzohet se është implikuar me ndërhyrjen në organet e drejtësisë, për rastin e dy vëllezërve Aliko, të dënuar për vrasjen e efektivit Ibrahim Basha, në Lazarat.
LEXO EDHE – 750 mijë euro për të favorizuar vëllezërit Aliko, ku implikohet Henri Çili
Konkretisht Çili dyshohet se ka ndikuar tek një zyrtar i lartë i drejtësisë, emri i të cilit nuk dihet, për të ndikuar në zbutjen e dënimit të Arbjon dhe Alban Alikos të dënuar përkatësisht me burgim të përjetshëm dhe 18 vite burg.
Zëvendëskryeministri Erion Braçe ka reaguar pas daljes së lajmit në faqen e tij zyrtare në Instagram duke postuar një foto të efektivit të vrarë të RENEA-s, Ibrahim Basha. Braçe ka shkruar gjithashtu se “gjaku i tij nuk do të bëhet kurrë para e pasuri për batakçinjtë”. Edhe pse nuk e ka përmendur direkt kjo fjali lë të kuptohet se i referohet gazetarit të arrestuar.
“I neveritur nga llumi që do drejtësinë për ta blere e shitur, i neveritur nga llumi politik që ulëret kundër reformës në drejtësi, por blerësit e shitësit i ka në listë deputetesh, i neveritur nga llumi me firmë e vulë që noterizon blerjen e shitjen e drejtësisë”, shton më tej Braçe.
Kujtojmë se të arrestuar të tjerë nga operacioni i policisë janë biznesmeni Seit Fishta, ish kandidat për deputet me LSI në vitin 2009 dhe me PS në vitin 2013 në Shkodër dhe noterja Shpresa Gjocaj 56 vjeçare me banim në Tiranë. Ajo është e dyshuar për veprën penale ‘Falsifikim i dokumenteve’ dhe dyshohet se është personi që ka firmosur kontratat noteriale të dhurimit të pasurive nga babai i vëllezërve Aliko tek Henri Çili.
Në lidhje me këtë ngjarje kanë reaguar edhe Kryeprokurori Olsian Çela i cili e komentoi atë si një nga rezultatet e reformës në drejtësi. Në të njejtën linjë me të ka qenë edhe reagimi i ministrit të Brendshëm, Sandër Lleshaj.
LEXO EDHE – Arrestimi i Henri Çilit, kryeprokurori: Është fryt i reformës në drejtësi
LEXO EDHE – Arrestimi i Henri Çilit, reagon Lleshaj: Rezultate të reformës në drejtësi
Ndërsa gjyqtari i Gjykatës së Lartë që ishte caktuar edhe si relator për këtë cështje Ardian Dvorani deklaroi se nuk ka qenë ulur asnjëherë në kafe me botuesin Henri Çili. /Opinion.al
LEXO EDHE – A ndikoi Henri Çili në Gjykatën e Lartë? Si përgjigjet Dvorani
