Sot u njoftua lajmi i hidhur për ndarjen nga jeta në moshën 89-vjeçare të aktores së mirënjohur Marika Kallamata.
Presidenti i Republikës, Ilir Meta ka shprehur ngushëllimet e sinqerta për të afërmit dhe bashkëpunëtorët se saj.
“Ndarja nga jeta e artistes së shquar dhe të dashur Marika Kallamata, është një humbje e pazëvendësueshme për teatrin dhe kinematografinë shqiptare!
Trashëgimia e pasur artistike, galeria e roleve të interpretuara me mjeshtëri të rrallë dhe të gjitha kujtimet që na la pas, nderohen me respekt dhe do të mbahen mend gjithmonë.
Duke ndarë dhimbjen, u përcjell ngushëllimet më të sinqerta të afërmve dhe bashkëpunëtorëve të saj, si edhe të gjithë artdashësve shqiptarë!”, ka shkruar Presidenti Meta në një postim në faqen zyrtare në Facebook.
Me mbi 50 rrole në Teatër dhe mbi 100 gjatë gjithë karrierës së saj si aktore, Marika Kallamata ishte një nga aktoret më të dashura për publikun. Ajo nisi karrierën e saj në fillim të viteve 50’. Në vitet 1958-1963, ndjek studimet dhe diplomohet në degën e dramaturgjisë, në Tiranë.
Në vitin 1982 ajo u nderua me urdhrin “Naim Frashëri”, dhe pas dy vjetësh mori titullin “Artiste e Merituar”.
Në vitin 1985 ajo doli në pension, por u rikthye në skenë veprat: “Shtëpia me dy porta”, “Nesër është vonë” dhe “Një baba tepër”. /Opinion.al
