Presidenti i Republikës, Bajram Begaj ka shprehur ngushëllime për ndarjen nga jeta të aktores Margarita Xhepa.
Përmes një postimi në rrjete sociale, Begaj ka përcjellë ngushëllime familjes së saj, komunitetit të artistëve dhe mbarë shqiptarëve.
Ai thotë se Margarita Xhepa ka qenë një artiste e madhe, një figurë publike e respektuar, grua dhe nënë e nderuar, e cila deri në vitet e fundit të jetës së saj iu kushtua artit.
“Me trishtim mësova se Margarita Xhepa, ylli i skenës dhe ekranit shqiptar, u shua sot.
Me interpretimet e saj, ku spikati në mishërimin e figurës së gruas dhe veçanërisht të nënës, Margarita Xhepa çoi dritë dhe u bë pjesë e dashur e familjeve shqiptare.
Artistja e madhe, një figurë publike e respektuar, grua dhe nënë e nderuar, deri në vitet e fundit të jetës së saj iu kushtua artit dhe artin e saj e përdori për kauza të rëndësishme në mbrojtje të grave dhe fëmijëve.
Ngushëllimet e mia më të ndjera shkojnë për familjen, që sot iu nda nga jeta njeriu i tyre i shtrenjtë, për komunitetin e artistëve shqiptarë dhe për mbarë shqiptarët që e kanë ndjekur dhe duartrokitur artin që Margarita Xhepa dhuroi ndër vite”, shkruan Begaj.