Policia e Durrësit ka arrestuar dy persona pasi gjatë kontrollit në makinën ‘Porche’ iu gjetën dy armë zjarri.
Burime nga policia thanë se kanë arrestuar Marjel Fierzën, i cili njihet edhe si një person me precedent të mëparshëm kriminal.
Në një njoftim për mediat, Policia e Durrësit bën me dije se ai bashkë me një tjetër person, janë arrestuar teksa lëviznin me një makinë luksoze, ku u gjetën dy pistoleta.
Arrestimet e tyre janë bërë në vrazhdën e kontrolleve të policisë për Plan-Operacionit “Vjeshtë 2017”, që ka si qëllim goditjen e pasurive të përfituara nga aktivitet e jashtëligjshme.
Mësohet se Fierza është përmendur një vit më parë në një dokument sekret të Ministrisë së Brendshme, ku flitej për një bashkëpunim mes Shullazit dhe Lulzim Berishës, i cili nga burgu drejtonte grupin e tij në Durrës dhe në terren delegonte urdhrat te personat e tjerë si Julian Meçaj, Marjel Fierza dhe Mond Çekiçi, etj.
Pak kohë më parë, ai mbeti i plagosur gjatë një atentati të bërë ndaj tij.
Arrestimet
Policia e Durrësit njofton se Efektivet e Drejtorisë Vendore të Policisë Durrës në bashkëpunim me specialistët për Krimet në Komisariatin e Policisë Durrës, në zbatim të Plan-Operacionit “Vjeshtë 2017”, në bazë të informacioneve nga strukturat policore për mbajtjen nën kontroll dhe goditjen e grupeve kriminale kanë arrestuar në flagrancë shtetasit:
- Marjel Fierza 30 vjeç, banues në Durrës;
- Genti Nderjaku 34 vjeç, banues në Durrës.
Arrestimi i tyre u bë pasi gjatë kontrollit të ushtruar në mjetin tip ‘Porche’, me drejtues shtetasin Marjel Fierza, u gjetën dhe sekuestruan në cilësinë e provave materiale:
- 2 armë zjarri pistoletë tip Beretta;
- automjeti tip Porche dhe
- 6 telefona celularë.
Kontrollet do të vijojnë edhe në ditët në vijim nga Strukturat e Drejtorisë Vendore të Policisë Durrës, thuhet në njoftim zyrtar të policisë, ku i bëhet thirrje edhe qytetarëve për bashkëpunim në luftën ndaj krimit: Për çdo informacion qytetaret mund të telefonojnë falas në numrin 129, Policia ju garanton anonimatin.
