Ministri i Brendshëm, Xhelal Sveçla, ka thënë se Danilo Vuçiç djali i presidentit serb, Aleksandër Vuçiç, ka hyrë dje në Kosovë si qytetar i thjeshtë.
Ai tha se pas shfaqjes së tij me bluzë provokative, polica ka marrë vendim që ta ndalojnë dhe ta kontrollojnë.
“Ai është shfaqur në Graçanicë me bluzë provokatikve, por policia ka marrë vendim që të ndalin dhe të kontrollojnë automjetet që kanë ardhur në mënyrë të çuditshme. Atij i është kërkuar të heqë bluzen që përmbante mesazhin provokativ, gjë që është pranuar nga i riu dhe më pas ata janë larguar për në Serbi”, është shprehur Sveçla.
Ndër të tjera, Sveçla tha se Vuçiq është gënjeshtar kronik, pasi sipas tij, djali i tij nuk është ndaluar tri herë, por vetëm një herë, në dalje të Prishtinës.
Sipas tij, gjatë kontrollit policor nuk është gjetur asgjë e dyshimtë. Po ashtu Sveçla shton se nëse do të kishte ndodhur e kundërta, policia do të kishte ndërhyrë menjëherë.
“Kur është bërë kontrolli ndaj tij, nuk është gjetur asgjë e dyshimtë. Nëse do të ishte gjendur ndonjë armë, policia e ka detyrim që të ndërmarrë hapat e duhur. Nëse dikush nga ta do të kishte armë, policia do t’i zbulonte. Kontrolli ishte i detajuar mjaftueshëm për të zbuluar armë ilegale nëse do të kishte në eskortë”, tha Sveçla.
