Është ndarë nga jeta ditën e sotme Presidenti i klubit të futbollit të Elbasanit, Arben Laze.
Laze gjatë presidencës së tij ktheu titullin kampion pas shumë vitesh në Elbasan. Në drejtimin e tij, klubi i Elbasanit për disa vite u kthye në një nga skuadrat më të suksesshme në futbollin shqiptar duke fituar titullin e dytë kampion në historinë e klubit pas 22 vitesh, në sezonin 2005-2006.
Mësohet se Laze ka ndërruar jetë si pasojë e një ataku kardiak. Për ndarjen nga jeta të tij ka reaguar edhe Presidenti i FSHF, Armando Duka.
“Pak orë më parë mora lajmin e rëndë se miku im i mirë, Presidenti i Elbasanit që ai e deshi aq shumë, Arben Laze, u nda nga ne. Është e vështirë dhe tani për mua ta besoj dhe të shkruaj këto fjalë për një njeri të mirë, plot humor dhe optimizëm, që kontribuoi aq shumë për futbollin shqiptar. Beni ishte një mik i të gjithëve ne, një njeri që nuk hiqte dorë lehtë nga përgjegjësitë dhe sfidat. Energjia e tij do t’i mungojë komunitetit të futbollit. Në këtë moment të vështirë për familjen e tij, miqtë e tij të shumtë, lutemi që shpirti i tij të prehet në paqe. Lamtumirë miku im, do më mungosh!”, shkruan Duka në rrjetet sociale.
