Legjenda e peshëngritjes shqiptare, Ymer Pampuri është ndarë nga jeta në moshën 73 -vjeçare, si pasojë e një ataku në zemër.
Ish-sportisti u shpall kampion olimpik në Olimpiadën e Mynihut, në vitin 1972.
Në moshën 27-vjeçare, peshëngritësi i “17 Nëntorit” të Tiranës theu në Gjermani rekordin olimpik të Yoshinobu Miyake të Japonisë në stilin e forcës. Gara u zhvillua më 29 gusht 1972 dhe Ymer Pampuri arriti të ngrinte 127,5 kilogramë.
Veç medaljeve e titujve, atij i është akorduar edhe titulli “Mjeshtër i Madh i Punës”, si dhe urdhri “Naim Frashëri” i klasit të parë. Në vitin 1981 ai hoqi dorë përfundimisht nga sporti.
