Është ndarë nga jeta At Arthur Liolin, një figurë e shquar e Kishës Ortodokse dhe komunitetit shqiptaro-amerikan.
Arthur Liolin lindi më 1943, në Nju Jork nga prindër shqiptarë me prejardhje nga Boboshtica e Korçës. Së fundmi ai ishte kancelar i Kryepeshkopatës Ortodokse Shqiptare me qendër në Boston dhe vlerësohej si një pasardhës i denjë i Fan Nolit, themeluesit të kësaj kishe.
Për ndarjen e tij nga jeta ka reaguar edhe presidenti Bajram Begaj, i cili në një postim në Facebook tha se do ta kujtonim At Lionlin si pasardhës të denjë të Fan Nolit.
Presidenti shprehu ngushëllimet e thella, ndërsa e quajti At Liolin mbështetës i palëkundur i Shqipërisë dhe i shqiptarëve.
“Me keqardhje mësova lajmin për ndarjen nga jeta të At Arthur Liolin, Kancelar i Kryepeshkopatës Ortodokse Shqiptare në Boston.
At Liolinin, këtë figurë të shquar të Kishës Ortodokse dhe të komunitetit shqiptaro-amerikan, do ta kujtojmë përherë si pasardhës të denjë të Fan Nolit, themeluesit të kësaj kishe.
Në vitin 1991, At Liolini realizoi ëndrrën e tij, duke meshuar në 22 qytete të Shqipërisë.
Ai nuk ishte thjesht një udhërrëfyes shpirtëror, por mbështetës i palëkundur i Shqipërisë dhe i shqiptarëve, mbështetje të cilën e shprehu edhe nëpërmjet botimeve ekonomike, kulturore, historike dhe filozofike mbi çështjen shqiptare.
Shpirti i tij u prehtë në paqe!”, shkruan Begaj./Opinion.al
