Aktorja e njohur e Teatrit dhe Kinematografisë shqiptare, Marika Kallamata ka ndërruar jetë në moshën 89-vjeçare.
Lajmin e ndarjes së saj nga jeta e ka bërë të ditur ministrja e Kulturës Elva Margariti.
“Ndonëse ka luajtur dhjetëra role në teatër e kinema, ajo do të mbetet për ne, përherë, gjyshja e përrallave. Marika Kallamata, aktorja e mrekullueshme, gruaja me pamje të paqtë e zë të ngrohtë, u nda prej nesh, duke lënë pas jo vetëm një galeri të pasur rolesh, kujtimesh të dashura, për të gjithë ata që e njohën nga afër, por edhe timbrin e ngrohtë: Na ishte seç na ishte…! U prehsh na paqe e dashura jonë, që na e përkunde fëmijërinë me mijëra fantazi! Homazhet do të mbahen nesër, në ambientet e “arTurbinës”, nga ora 11:00-13:00“, shkruan Margariti.
Me mbi 50 rrole në Teatër dhe mbi 100 gjatë gjithë karrierës së saj si aktore, Marika Kallamata ishte një nga aktoret më të dashura për publikun. Ajo nisi karrierën e saj në fillim të viteve 50’. Në vitet 1958-1963, ndjek studimet dhe diplomohet në degën e dramaturgjisë, në Tiranë.
Në vitin 1982 ajo u nderua me urdhrin “Naim Frashëri”, dhe pas dy vjetësh mori titullin “Artiste e Merituar”.
Në vitin 1985 ajo doli në pension, por u rikthye në skenë veprat: “Shtëpia me dy porta”, “Nesër është vonë” dhe “Një baba tepër”. /Opinion.al
