Kreu i opozitës në Rusi mund të jetë helmuar me lëndë toksike deklaron mjekja e tij Anastasiya Vasilyeva. Pasi u dërgua një ditë më parë me urgjencë nga burgu në spital, për shkak të një reaksioni të fortë alergjik, Alexei Navalny, është shprehur se kjo nuk mund të jetë alergji.
Në një postim në blogun e tij, Navalny shkruan se ai e di se çfarë reaksionesh shkaktojnë alergjitë pasi gruaja e tij vuan nga to. Ai shton se kur u zgjua natën kishte fytyra, veshët dhe qafa i ishin acaruar dhe nxehur aq shumë sa edhe rojet e burgut ishin trembur.
Anastasiya Vasilyeva tha se simptomat e Navalnit tregojnë se ai mund të jetë ekspozuar ndaj një agjenti toksik.
Navalny shkruan se avokates së tij dhe mjekes nuk iu dha diagnoza e tij dhe ndërkohë një raport i detajuar u shfaq në lidhje me të në agjensitë ruse të lajmeve.
Mjekja e kreut të opozitës ruse shprehet se atë nuk e kanë lejuar të takojë pacientin e saj dhe se kur ajo është afruar, stafi i spitalit, siç thotë, ka nisur të sillet në mënyrë të çuditshme.
Drejtoresha e spitalit ku ai u dërgua, Olga Sharapova, raportohet të jetë ligjvënëse e partisë së Putinit, Rusia e Bashkuar.
Pas trajtimit të marrë në spital, 43 vjeçari është rikthyer në qeli, ku sipas Vasilyevas, substanca helmuese ndoshta është ende e pranishme.
Navalny u dënua me 30 ditë burg javën e kaluar pasi thirri një protestë të shtunën për të cilën nuk kishte marrë leje në organet zyrtare.
Më shumë se 1 mijë persona u arrestuan nga policia gjatë demonstratës kundër mos lejimit të regjistrimit të kandidatëve të opozitës në zgjedhjet e ardhshme në Rusi. /Opinion.al
