Nga Bratislava ku ka vizituar trupat e NATO-s Sekretari i Përgjithshëm Mark Rutte tha se stabiliteti në Kosovë është në interesin e të gjithëve.
Përballë aludimeve mediatike se Presidenti Trump mund të tërheqë trupat amerikanë nga Ballkani Perëndimor, Rutte theksoi se nuk sheh arsye për të besuar se mund të ketë ndonjë ndryshim dramatik në aspektin e angazhimit amerikan ndaj aleancës veriatlantike.
“Nga ajo që unë kuptoj nga sistemi amerikan është se ata mbeten plotësisht të përkushtuar ndaj NATO-s dhe angazhimeve aktuale. Por le të shohim se çfarë do të ndodhë. Nuk kam asnjë arsye të besoj se do të ketë vendime dramatike. Ne po monitorojmë nga afër situatën në Ballkanin Perëndimor. Stabiliteti në Kosovë, në Bosnje dhe në Serbi është në interesin e të gjithëve”, tha Mark Rutte.
Rutte ka folur edhe për zgjedhjet parlamentare në Kosovë.
“Së fundmi kemi pasur zgjedhje në Kosovë. Rezultati përfundimtar ende nuk është finalizuar, por është e qartë se partia kryesore që aktualisht qeveris Kosovën mund të ketë nevojë për të krijuar një koalicion qeverisës. Të shohim se si do të zhvillohen bisedimet për këtë. Formimi i koalicioneve është pjesë e procesit normal demokratik. Jam në kontakt me liderët e Rajonit në mënyrë që të ruajmë stabilitetin aty. Aty kemi një histori paqëndrueshmërie në këtë pjesë të Evropës ndaj duhet të jemi të vëmendshëm për zhvillimet në vijim”, tha Rutte.
NATO ka një mision paqeruajtës në Kosovë që nga përfundimi i luftës. Aktualisht, janë mbi 4600 trupa nga 28 shtete të dislokuara në Kosovë si pjesë e KFOR-it. Numri më i madh i ushtareve është nga Italia, pasuar nga Shtetet e Bashkuara, Hungaria dhe Turqia.
NATO rriti praninë e saj në Kosovë gjatë vitit 2023, pas rritjes së tensioneve në veri i banuar me shumicë serbe./ Klan News
