Një eklips i dyfishtë ka ndodhur në planetin Mars. Fenomeni i veçantë është vëzhguar nga “Rover Curiosity” i NASA-s, i cili ndodhet në sipërfaqen e planetit të kuq prej mëse 6 vitesh.
Eklipset diellore të provokuar nga dy satelitët e tij të vegjël, Phobos dhe Deimos, kanë zgjatur shumë pak, për vetëm disa sekonda. Të dyja hënat e Marsit, me dimensione shumë të vogla, nuk kanë arritur të errësojnë diskun e diellit, por kanë projektuar një hije të vogël kalimtare.
Gjithsesi nga ana shkencore ky fenomen konsiderohet mjaft i rrallë dhe i rëndësishëm pasi ndihmon në studimin e orbitave të Phobos dhe Deimos përreth planetit të tyre. Hëna e tij Phobos aktualisht orbiton shumë pranë Marsit, vetëm 5800 km, ndërsa Deimos që është edhe sateliti më i vogël i gjithë sistemit tonë diellor, orbiton rreth 24 mijë km nga planeti mëmë.
Kjo afërsi e madhe e tyre shkakton edhe ndryshime orbitale si pasojë e tërheqjes gravitacionale, çka bën shkencëtarët të parashikojnë se pas 50 milionë vitesh do të ketë një impakt të hënës Phobos mbi Mars./Opinion.al
