Astronomët kanë kapur imazhin e parë të drejtpërdrejtë të një ekzoplaneti me teleskopin hapësinor James Webb.
CCN shkruan se eksoplaneti, ose planeti jashtë sistemit tonë diellor, është një gjigant gazi rreth gjashtë deri në 12 herë më i madh se masa e Jupiterit. Planeti, i quajtur HIP 65426 b, është rreth 15 deri në 20 milionë vite, një planet “foshnjë” kur krahasohet me tokën, e cila është 4.5 miliardë vite. Ndodhet rreth 385 vite dritë larg nga Toka.
Webb e sheh universin në dritën infra të kuqe, e cila është e padukshme për syrin e njeriut dhe e bën atë observatorin e përsosur hapësinor për të zbuluar detaje rreth botëve të largëta. “Ky është një moment transformues, jo vetëm për Webb, por edhe për astronominë në përgjithësi,” tha në një deklaratë Sasha Hinkley, profesor i asociuar i fizikës dhe astronomisë në Universitetin e Exeter në Mbretërinë e Bashkuar.
Eksoplaneti u zbulua për herë të parë në vitin 2017 duke përdorur teleskopin shumë të madh të Observatorit Jugor Evropian dhe instrumentin e tij SPHERE, të vendosur në Kili.
Instrumenti mori imazhe të planetit më pas përmes gjatësive të shkurtra valore infra të kuqe, por aftësia e Webb për të parë gjatësi vale më të gjata infra të kuqe mund të hedhë dritë mbi detaje të reja./Opinion.al
