Skuadra e Nantes ka vijuar me kërkesat e saj për plotësimin e kontratës nga Cardiffi. Skuadra iu drejtua FIFA-s me një ankesë për mungesën e pagesës nga ana e Cardiffit, lidhur me blerjen e sulmuesit Emiliano Sala, i cili humbi jetën tragjikisht pas një aksidenti ajror në kanalin e La Manshit.
Ekipi francez i Nantesit pretendon të marrë 17 milionë euro për sulmuesin, ashtu siç palët kishin rënë dakord më herët për transferimin e tij, gjë që është e cilësuar edhe në kontratë.
Nga ana tjetër, vetëm pak ditë më parë, presidenti i skuadrës uellsiane tha se skuadra e Cardiffit do të paguante nëse do të detyrohej, por bëri thirrje që francezët të ulin pretendimet e tyre, duke marrë parasysh atë që ka ndodhur.
Skuadrat kishin rënë dakord për transferimin e sulmuesit argjentinas te klubi uellsian, por gjithçka mori fund kur avioni me të cilin Sala po udhëtonte drejt Uellsit, u rrëzua në kanalin e La Manshit./E.M
