Pas publikimit të draft-opinionit të Komisionit të Venecias palët politike janë të ndara, nëse Presidenti Ilir Meta ka bërë shkelje të rënda kushtetuese apo jo dhe a duhet shkarkuar.
Këtë të hënë në emisionin Opinion, pikërisht është diskutuar për këtë draft-opinion dhe siç ndodh zakonisht të ftuarit kanë qëndrime të kundërta.
Mustafa Nano: Besoj që raporti është i qartë. Një, presidenti ka shkelur kushtetutën. Mund të diskutohet e rëndë apo jo, kjo mund të diskutohet. Unë kam mendimin që nuk është shkelje e rëndë. Venecia ka rënë dakord që zgjedhjet e 30 qershorit duheshin bërë, ishin zgjedhje legjitime. Unë vetëm kam votuar në 30 qershor, edhe kur kam shkuar të votoja ka qenë një ditë e shëmtuar, ka qenë si funeral, unë kam qenë i bindur se kam bërë vendimin e drejtë. Ky vendim ky opinion e ka një gjë të mirë, që më bën mua të mendoj se kam bërë zgjedhjen e duhur.
Preç Zogaj: Unë nuk kam votuar në 30 qershor, por kam pasur gjithnjë mendimin se bojkoti i zgjedhjeve ishte një gabim. Kam qenë skeptik, për dekretin e presidentit sepse nuk kishte shteruar mundësinë për një dialog mes palëve. Duhej një vendim i negociuar, këtu nuk ka hapësirë për të lexuar ndryshe. Draft opinioni është korrekt, ne tani jemi në fazën e një opinioni paraprak nuk e di a mund të ndryshojë. Nuk thuhet se presidenti ka shkelur kushtetuan, por ka tejkaluar kompetencën.
Adnor Shameti: Opinioni sqaron që me veprimet e veta, duke anuluar dekretin e 30 qershorit dhe duke bërë një dekret të ri për një datë tjetër, presidenti i republikës ka shkelur kushtetutën. Sepse ka mohuar një të drejtë themelore që është e drejta për tu zgjedhur dhe e drejta për të zgjedhur. Ka kaluar përtej afateve kushtetuese.
Komisioni i Venecias vlerësoi se Presidenti Ilir Meta ka vepruar në tejkalim të kompetencave të veta kushtetuese, ndërsa vendosi të anulojë 30 Qershorin si datë të zgjedhjeve vendore.
Në draft opinionin e tij, Komisioni megjithatë vëren se sipas tij, nuk janë kushtet për të vërtetuar një shkelje serioze që do të çonte në shkarkimin e tij.
Në përfundimet e tyre, pasi kanë analizuar me detaje të gjithë rastin, ekspertët e Komisionit theksojnë se “në mungesë të një dispozite ligjore, Presidenti mund të anulojë zgjedhjet për organet e qeverisjes vendore, vetëm në një situatë e cila plotëson kriteret për marrjen e masave të jashtëzakonshme”. Por sipas tyre “edhe atëherë Presidentit i duhet një bazë ligjore specifike për të shtyrë zgjedhjet”./ Opinion.al
