Kryeministri, Edi Rama, njoftoi këtë të mërkurë në fjalën përmbyllëse të mandatit të dytë të qeverisë se deputetja e zgjedhur e PS, Najada Çomo i kishte kërkuar të linte mandatin e deputetit, për t’iu përkushtuar punës në Spitalin Infektiv në Tiranë pas rritjes së rasteve me Covid -19.
Por kush do ta zvendësojë Çomon në parlamentin e ardhshëm? Sipas kodit zgjedhor një deputet që i përket shtresës më pak të përfaqësuar në Parlament (në këtë rast gratë) lë mandatin për një arsye të caktuar, ky mandat i shkon një tjetër kandidati të po kësaj shtrese, në bazë të votave të mbledhura.
Kështu, Çomo, e cila mbante numrin dy në listën e socialistëve të 25 Prillit, do të zëvendësohet nga kandidatja grua pasuese në listë me numrin më të madh të votave.
Kandidatja e cila vjen e para në listën e socialistëve dhe që ka mbledhur më shumë vota është ish-ministrja e Mbrojtjes Mimi Kodheli. Ajo arriti të marrë 5597 vota preferenciale në zgjedhjet e 25 prillit./Opinion.al
