Deputeti i Partisë Demokratike Dashnor Sula ka reaguar pas arrestimit nga policia të 13 personave dhe sekuestrimit të 62 mijë litrave naftë kontrabandë. Në një postim në rrjetet sociale, Sula shprehet se në vendin tonë jo vetëm që nafta kontrabandohet, por thyhet edhe embargoja e vendosur me Libinë. Ai shprehet se pavarësisht arrestimeve, porositësit e naftës kanë dalë të paprekur nga kjo histori. “Nuk i hyn asnjë gjëmb në këmbë atyre që porosisin naftën”, shprehet Sula.
Postimi i plotë
Kush janë porositësit e naftës kontrabandë?
Në mënyrë të përsëritur në Shqipëri futet naftë kontrabandë. Kohët e fundit skandali është zgjeruar pasi jo vetëm kontrabandohet nafta, por thyhet edhe embargo e vendosur me Libinë. Dje policia lajmëroi se ka kapur 62 mijë litra naftë në dy peshkarexha.
Nga ana e policisë lajmi shitet si një arritje, por ajo që shqetëson shqiptarët është fakti se nga kush ka frikë shteti që nuk deklaron apo nuk ndëshkon porositësit e naftës. Si në rastin e parë edhe në këtë të dytin policia mburret se kapja u bë pas veprimeve të koordinuara me partnerët, por në fakt nuk e lejon operacionin e jashtligjshëm që të shkojë deri në fund në mënyrë që të zbulohen edhe porositësit e vërtetë të naftës. Si në rastin kur u sekuestrua anija cisternë në verë, por edhe dje, në prangat e policisë kanë rënë vetëm ata që në zhargon quhen peshqit e vegjël. Nuk i hyn asnjë gjëmb në këmbë atyre që porosisin naftën.
Nëse policia arreston vetëm kapitenët e anijeve, trafikantët e naftës e kanë të lehtë të gjejnë kapitenë të tjerë dhe të bëjnë sërish këtë aktivitet. Ndaj theksoj që problemi i vërtet është porositësi dhe ata që ofrojnë garanci në Shqipëri që këto aktivitete të funksionojnë.
