Nafta ka vijuar të shtrenjtohet ndjeshëm në tregjet ndërkombëtare. Një fuçi naftë po shitet me rreth 91 dollarë duke regjistruar nivelin më të lartë në dy vitet e fundit. Ky shtrenjtim erdhi i nxitur së fundmi për shkak se Katari ka paralajmëruar se i gjithë prodhimi i Gjirit mund të ndalet brenda pak ditësh.
Nafta e papërpunuar Brent u rrit me më shumë se 12% të premten, niveli më i lartë që nga vjeshta e vitit 2023.
Parashikimet janë të zymta dhe vlerësohet se nafta mund të arrijë në 150 dollarë për fuçi nëse konflikti me Iranin vazhdon gjatë javëve të ardhshme.
Analistët paralajmërojnë se nëse çmimi i naftës dhe gazit mbetet i lartë, kjo mund të nxisë inflacionin në ekonomitë kryesore botërore si Mbretëria e Bashkuar dhe SHBA-ja, ku ka qenë në një trend gjerësisht në rënie.
Rreth një e pesta e furnizimit botëror me naftë zakonisht transportohet përmes Ngushticës së Hormuzit çdo ditë.
Por trafiku përmes këtij kanali të ngushtë pothuajse është ndalur që kur filloi lufta SHBA-Izrael me Iranin fundjavën e kaluar.
Bllokimi i ngushticës mund t’i bëjë mallrat dhe shërbimet më të shtrenjta në nivel global dhe të godasë disa nga ekonomitë më të mëdha në botë, përfshirë Kinën, Indinë dhe Japoninë, të cilat janë ndër importueset kryesore të naftës bruto që kalon nëpër këtë rrugë ujore.
Lufta në Lindjen e Mesme, ndaloi transportin detar përmes Ngushticës së Hormuzit duke çuar në një ndërprerje të madhe të furnizimeve globale me karburant.
Ngushtica përdoret për të transportuar afërsisht 20 përqind të furnizimeve të naftës bruto në botë.
