Tashmë fermerët do të duhet të paraqesin më pak dokumente për të përfituar naftë për punimet në bujqësi. Tashmë ministria e Bujqësisë dhe ministria e Financave kanë miratuar ndryshime në udhëzimin e ri duke thjeshtuar dokumentacionin që duhet të ngarkohet në sistem gjatë aplikimit nga fermerët.
Çdo subjekt përfitues, sipas udhëzimit duhet duhet të provojë aktivitetin bujqësor për të cilin aplikon, duke paraqitur: faturë blerje për një nga imputet si farërat ose fidanët, plehrat kimike apo pesticidet, ose faturë për shitjen e prodhimit.
Kështu, fermerët mund t’i ngarkojnë faturat në sistem në momentin e aplikimit ose mund t’i dorëzojnë fizikisht në Agropikat ose në zyrat qendrore të Agjencisë për Zhvillimin Bujqësor dhe Rural.
Udhëzimi i ri përcakton gjithashtu se dokumentacioni që duhet të ngarkohet në sistem është në varësi të statusit të pronësisë apo përdorimit të tokës bujqësore për të cilën aplikohet dhe statusit të regjistrimit të saj në Agjencinë Shtetërore të Kadastrës.
