Andi Maloku ishte viktima e vetme e atentatit që ndodhi në mbikalimin e Shkozetit ku mbeti i plagosur prokurori Arian Ndoja dhe Aleksandër Laho.
24-vjeçari punonte si shofer i prokurorit Ndoja me të cilin nuk kishte njohje familjare sipas xhaxhait të tij. Në një intervistë ky i fundit është shprehur se Andi kishte “rreth dy muaj që kishte vazhduar punë me prokurorin si shofer i tij”.
Ai është shprehur i zhgënjyer me instancat shtetërore dhe pretendon si janë bërë padrejtësi pasi pranon se familja e tyre ka kontribuuar për këtë qeveri.
“ Me drejtësinë jemi të pakënaqur fare, dhe nga qeveria jemi të pakënaqur sidomos ne që kemi kontribuar për këtë qeveri. Sidomos dhe djali që ka qenë në komision. Anëtar komisioni në Shijak, se ne jemi nga Shijaku. Më parë ka punuar kamerier. Asnjë lloj pune tjetër s’ka bërë. Djali ishte 23 vjeç për pak ditë mbushte 24 vjeç dhe nuk ka punuar asnjë punë tjetër. Ne jemi të gatshëm të gjithë që të tregojmë dokumentet e djalit se ku ka punuar. Ai nuk kishte lidhje fare as me policinë, as nuk ka punuar si efektiv policie. Nuk ka bërë asnjë sherr në lagje. Nuk ishte problematik dhe nuk ka konflikt me asnjë person. Ne e çuam djalin për të qenë më i sigurt si shofer prokurori. Nuk e dinim që do përfundonte kështu” shprehet Bashkim Maloku.
Ai zbulon gjithashtu se ata janë vënë në dijeni të ngjarjes nga vetë viktima i cili pasi kishte ndodhur atentati kishte marrë në telefon të atin.
“Kur ndodhi atentati ne e morëm vesh përmes djalit. Andi kishte folur me të atin në telefon dhe i kishte thënë “o babi na gjuajtën, jam plagosur”. Ky ishte komunikimi dhe më pas na lajmëruan që të shkonim te spitali se i kanë gjuajtur djalit”. /Opinion.al
