Myrto Uzunie është shpallur lojtari më i mirë në La Liga 2 për sezonin që lamë pas. Shqiptari zhvilloi një vit fantastik edicionin e kaluar dhe falë golave të këtij lojtari, Granada arriti që të kalonte në elitën e futbollit spanjoll duke fituar titullin kampion në La Liga 2.
Në një postim në rrjetet, sociale ai u shpreh i lumtur për këtë vlerësim, ndërsa shtoi se nuk do të ndalet më kaq.
“Të qenit lojtari më i mirë në La Liga 2 në Spanjë është një krenari e madhe për mua. Isha golashënuesi më i mirë dhe ndihmuam Granadan të ngjitej në elitë, një ëndërr e bërë realitet”, shkruan mes te tjerash futbollisti shqiptar.
Me 23 gola dhe pesë asistime, beratasi ishte pika kyçe e skuadrës Granadës edicionin e kaluar, me këta të fundit që u ngjitën në elitën e futbollit spanjoll duke u shpallur kampionë në ligën e dytë spanjolle. Edhe këtë vit shqiptar konsiderohet një pikë referimi për skuadrën e Granadas me të cilën deri më tani ka shënuar 4 gola në La Liga.
