Mynyr Koni, rektori i Universitetit të Tiranës ka shkuar këtë të martë në punë, pasi presidenti Ilir Meta rrëzoi një kërkesë nga ministrja e Arsimit për ta shkarkuar.
Si arsye e rrëzimit të kërkesës së Ministrisë së Arsimit, Kreu i Shtetit thotë se marrja e një vendimi për shkarkimin e Rektorit të Universitetit të Tiranës, do të cenonte rëndë autonominë e institucioneve të arsimit të lartë.
“Presidenti i Republikës, vlerëson se në kushtet aktuale, bazuar në propozimin e bërë, marrja e një vendimi për shkarkimin e Rektorit të Universitetit të Tiranës, do të cenonte rëndë dhe, në tërësi, autonominë e institucioneve të arsimit të lartë dhe lirinë akademike të vendosur dhe të mbrojtur nga Kushtetuta, por dhe nga jurisprudenca e Gjykatës Kushtetuese, pasi ushtrimi i kompetencave kontrolluese nga Ministri i Arsimit në këtë rast për gjithë sa u parashtrua më sipër nuk është kryer në mënyrë objektive, shteruese, proporcionale dhe transparente”, shprehet kreu i shtetit.
Por si e komenton, rektori Koni vendimin e Presidentit? Sipas tij Meta ka mbajtur në qëndrim prej shtetari.
“Ka treguar gjatë gjithë kohës së tij se mbrojti dhe siguroi autonominë institucionale dhe garantoi lirinë akademike, të drejtat e fituara nga ana kushtetuese. Kështu që në emrin tim personal, të stafit akademik të studentëve të UT-së e vlerësoj maksimalisht. Nga ana tjetër e garantoj presidentin dhe gjithë strukturat e universitetet që do të punoj në përkushtueshmëri”.
Rektori Koni akuzon ministren e Arsimit se refuzoi një takim shpjegues, megjithatë thekson se është i hapur të dialogojë me këdo. /Opinion.al
