Policia e Tiranës ka gjobitur me nga 1 milion lekë, 3 lokale të cilët nuk e kanë nuk kanë respektuar Aktin Normativ për ndalimin e muzikës pas orës 20:00.
Autoritetet njoftojnë se lokalet e gjobitur ndodhen në zona të ndryshme të kryeqytetit. Policia e Tiranës iu bën apel administratorëve të subjekteve që të respektojnë masat e anti-COVID.
Njoftimi i policisë
Tiranë-Policia ka gjobitur me nga 1 milion lekë, 3 subjekte që ushtronin aktivitet të shoqëruar me muzikë, në kundërshtim me Aktin Normativ dhe urdhrin e Ministrisë së Shëndetësisë.
Në vijim të kontrolleve të vazhdueshme në subjekte të ndryshme, me qëllim parandalimin e përhapjes së COVID-19, në zbatim të Aktit Normativ Nr. 30, datë 20.07.2020, neni 3, pika 7/2 “Në çdo mjedis shërbimi ndalohet muzika pas orës 20:00”, shërbimet e Policisë kanë konstatuar 3 subjekte në zona të ndryshme të Tiranës, të cilat ushtronin aktivitetin me muzikë pas orës 20:00, në kundërshtim me Aktin Normativ, duke mos respektuar kufizimin e përcaktuar nga Policia e Shtetit.
Në përfundim të veprimeve të para, për secilin nga këto subjekte, me administratorë shtetasit Sh. K., B. L. dhe B. K., shërbimet e Policisë kanë vendosur masë administrative 1.000.000 lekë.
Policia e Tiranës apelon për të gjithë administratorët e subjekteve që ushtrojnë aktivitet, të respektojnë me rigorozitet protokollet e sigurisë dhe masat kufizuese, me qëllim parandalimin e përhapjes së COVID-19./ Opinion.al
