Një nga muzat më me ndikim të muzikës rok ishte Xhejn Asher, ish e dashura e Pol Mekartnit të “The Beatles”, ndikimi i të cilës, mund të gjendet në disa prej këngëve më të famshme të grupit.
Xhejn dhe Pol u takuan në vitin 1963, kur Asher 17-vjeçare, u dërgua të mbulojë si gazetare një koncert të Beatles në Royal Albert Hall për revistën britanike “Radio Times”. Historia do të përfundonte me një fotografi të Asherit që sheh grupin me një shprehje adhurimi, të shoqëruar me fjalët, “Këta janë ata, për të cilët do ta ulërija!”.
Të gjithë në grup e kishin joshur, por ishte Pol ai që do t’i fitonte zemrën. Shumë shpejt, Pol dhe Asher nisën të bashkëjetojnë. Një vit më vonë, ai u zhvendos në shtëpinë e prindërve të saj.
Në atë shtëpi, Pol shkroi shumë këngë të njohura të The Beatles. Asher shërbeu si një muzë për Polin, e me marrëdhënien e tyre disi të trazuar, ajo u bë frymëzim për këngë të tilla si “We Can Work It Out”, “All My Loving”, “And I Love Her”, “Here There and Everywhere”, and “You Won’t See Me”.
Por ndikimi i Asher do të zgjaste përtej këngëve. Teksa jetonte me familjen e saj, djaloshi i klasës punëtore nga Liverpuli, ishte i ekspozuar ndaj një mënyre jetese krejtësisht të ndryshme dhe të pasur. Babai i Jane, Dr.Riçard Asher, ishte kreu i departamentit psikiatrik në Spitalin Qendror Midëlleseks në Londër, e ëma, Margaret, profesore e veglës së oboes në Shkollën e Muzikës dhe Dramës së Gilldholl.
Ndryshimi i mjedisit, e zgjeroi horizontin kulturor të Mekartni, duke e ekspozuar atë ndaj botës së muzikës klasike. Margaret Asher i dha leksione muzike Mekartnit, duke i mësuar të luajë në flaut, një instrument që do të shfaqet në mënyrë të dukshme në këngën “Fool on the Hill”.
Por tradhëtitë, alkooli, jeta e shthurur e Polit solli ndarjen e tyre në korrikun e vitit 1968. Ndarjen e bëri publike Asher në një emision në BBC, ku njoftoi se marrëdhënia mes saj dhe Polit kishte marrë fund.
“Nuk e prisha unë atë marrëdhënie. Por kur gjithçka merr fund, merr fund”- tha Asher gatë asaj interviste. “Unë e di se mund të tingëllojë keq, por ne ende e takojmë dhe e duam njëri-tjetrin, por kjo nuk ka funksionuar. Ndoshta do të jemi sërish fëmijë të çiltër, dhe do të takohemi sërish dhe martohemi kur të jemi rreth 70 vjeç”.
Në fakt nuk ndodhi kështu. Asher u takua me karikaturistin politik Gerald Skarfe në vitin 1971. Ata u martuan 10 vite më vonë, dhe patën bashkë 3 fëmijë. Gjatë viteve, Asher gëzoi gjithashtu një karrierë të suksesshme si aktore, por edhe si shkrimtare duke shkruar si romane, ashtu edhe libra me këshilla për stilin e jetesës./E.M
Burimi:Vintage News
