Eugena Tomini ka komentuar ditën e sotme mutacionin e ri që ka pësuar COVID-19 në Mbretërinë e Bashkuar, atje ku rastet janë rritur ndjeshëm.
Sipas saj me rëndësi është të mësohet niveli i transmetueshmërisë dhe nëse riinfektohen personat të cilët e kanë kaluar njëherë COVID-19.
Ndërkohë sipas ekspertes, është e këshillueshme të ndiqen të njëjtat masa mbrojtëse sepse po i referohemi të njëjti grupi virusesh.
“Në javët e fundit në Mbretërinë e Bashkuar ka pasur një rritje të shpejtë të rasteve me Covid-19. Duhet të përdorim të njëjtat masa mbrojtëse, pasi flasim për të njëjtin grup virusesh që transmetohen nëpërmjet spërklave. Është shumë e rëndësishme të dimë nivelin e transmetueshmërisë. Të dimë sa agresiv është virusi, ndërkohë të dimë nëse riinfektohen personat që e kanë kaluar. Është një virus që po studiohet në mënyrë intensive dhe të rejat e fundit sërish që do t’i marrim nga raportimet e OBSH. Jemi herët për të gjykuar mbi efektin e vaksinës kundrejt këtij mutacioni”, u shpreh Tomini.
Ndërkaq, ndër të tjera Tomini në A2 ka komentuar dhe masat e marra për kufizimin e lëvizjes nga data 24 dhjetor deri 4 janar.
“Një ndër elementët e vlerësuar sa i përket uljes së transmetimit të virusit është distancimi fizik dhe festat nuk ta mundësojnë këtë. Do të kishim grumbullime në bare apo restorante dhe ky është një nga elementët që mund të ndikojë. Situata po vlerësohet në mënyrë dinamike dhe këto masa të marra nuk janë fikse. Nga data 5 janar ne do të rikthehemi me orën policore, nga ora 22:00 deri në 06:00. Ndërkohë, mësimdhënia për shkollat do të fillojnë sipas orientimit të Ministrisë së Arsimit për datën 11 janar”, tha Eugena Tomini./Opinion.al
