Situata e krijuar nga koronavirusi ka cuar në përshkallëzim të situatës politike në Kosovë.
Sot kryeministri Albin Kurti ka njoftuar shkarkimin e ministrit të Brendshëm, Agim Veliu por me këtë vendim nuk ka rënë dakord kreu i LDK-së Isa Mustafa.
Veliu ishte një nga ministrat e LDK-së në qeveri dhe Mustafa e ka konsideruar vendimin e Kurtit si të njëanshëm dhe në kundërshtim me marrëveshjen e koalicionit.
“Për mua dhe LDK-në është i papranueshëm shkarkimi i Ministrit të Punëve të Brendshme dhe Administratës Publike, z. Agim Veliu. Kjo është shkelje e Marrëveshjes së koalicionit. Me marrëveshje kemi përcaktuar se ministrat mund të shkarkohen nga Kryeministri në konsultim me Kryetarin e subjektit politik me të cilin është bërë koalicioni, bazuar në një arsyetim që e pranon Kryetari i LDK-së”, shkruan Mustafa duke shtuar se nuk i pranon as arsyet e bëra publike prej Kurtit.
Ai i ka dhënë një ultimatum kreut të VV që të tërheqë shkarkimin e ministrit Veliu dhe të heq plotësisht tarifën për mallrat serbe deri në fund të javës.
“Kërkoj nga Kryeministri të anuloj vendimin për shkarkimin e z. Veliu dhe të merr vendim per heqjen e taksës deri në fund të javës.Veprimet e njëanshme të Kryeministrit janë të dëmshme dhe të papranueshme dhe qojnë në prishje të koalicionit”, shkruan Mustafa. /Opinion.al
