Kryetari i LDK-së, Isa Mustafa mohoi zërat se bisedimet mes partisë së tij dhe Vetëvendosjes për marrëveshjen e koalicionit janë të ngrira.
Klan Kosova raporton se pas takimit me kryetarët e degëve, të cilët tha se i njoftoi me ecurinë e bisedimeve, Mustafa nënvizoi se propozimi i LDK-së për president bëhet kur të vijë koha për zgjedhjen e tij.
“Edhe çështja e presidentit mendojmë që është parimore, është një ekuivalencë që duhet të krijohet në mes të dy partnerëve. Po ashtu është çështje e mirëbesimit ndërmjet nesh në mënyrë që edhe ndarja e pozitave të bëhet e tillë që asnjëra palë të mos dalë super e fuqishme nga ky koalicion, por të kemi pjesëmarrje në ndarje të përgjegjësive karshi votës që kemi marrë para qytetarëve të Kosovës”.
“Nuk është problem emri por duhet të kemi vullnet dhe duhet të kemi besim. Nëse ne si LDK kemi besim ta votojmë Kurtin për kryeministër dhe t’i japim përgjegjësi kaq të mëdha, atëherë presim besim edhe nga partneri jonë ndaj LDK-së. Të mos dyshojmë sepse nëse dyshojmë punët nuk shkojnë mirë”.
Mustafa gjithashtu tha se deri më tani me Vetëvendosjen janë pajtuar për programin qeverisës dhe deri diku për ndarjen e përgjegjësive.
Ai pohoi se bisedimet me Albin Kurtin do të vazhdojnë, pa dhënë ndonjë datë për takimin e radhës. /Opinion.al
