Deputeti Myslym Murrizi ka folur për mediat pas përfundimit të takimit me kryeministrin Edi Rama.
Murrizi është shprehur se opozita parlamentare nuk do e votojë miratimin e reformës zgjedhore në Kuvend, nëse nuk pranohet kërkesa për lista të hapura.
“Kryeministri Rama vazhdon ta ketë marrëveshjen me ata që e gatuan këtë sistem zgjedhor që iu mohuan të drejtën e votës shqiptarëve në Prill të vitit 2008. Nuk votojmë asnjë lloj pazari që kërkon t’u shitet shqiptarëve si marrëveshje. Ata kanë hall pushteti, unë bashkë me kolegët kërkuam që shqiptarët të votojnë përfaqësuesit e tyre dhe nuk pranojmë asnjë lloj arnimi apo buzëkuqi nëse nuk hapen listat. Ramës i bëmë të qartë që mund ta vazhdosh sa të duash pazarin me ata që janë jashtë, por votat i ke me opozitën parlamentare dhe ne nuk votojmë asgjë. Rama është si Basha dhe Kryemadhi që nuk i duan shqiptarët si zgjedhës, por si votues. Besoj tek uniteti i opozitës që do ta ulin zoti Rama dhe 74 deputetët që ka zoti Rama”,-tha Murrizi./ Opinion.al
