Kreu i grupit parlamentar demokrat, Myslym Murrizi ka deklaruar se deputetët që ai përfaqëson do të votojnë njëherë ndryshimet kushtetuese të propozuara nga ata dhe pastaj marrëveshjen e 5 qershorit për Kodin Zgjedhor.
Në hyrje të zyrave të Kuvendit, Murrizi e cilësoi si fitore të opozitës parlamentare faktin që Partia Socialiste ra dakord për hapjen e listave zgjedhore. Ai shtoi gjithashtu se nuk do të heqin dorë nga kushti që numëruesit e votave të jenë të depolitizuar.
“Kjo është një fitore e parë e opozitës parlamentare. Ju pata thënë se avash avash edhe kryeministri do të ulet më këmbë në tokë, po ashtu edhe shumë të tjerë në ditët në vijim që kanë kërkuar të firmosin për hatër të Europës dhe Amerikës. Ne nuk e kemi qëllim të ruajmë monopolin e karrigeve tona në parlament.
Rama nuk miraton asgjë në konferencë shtypi. Votimi në parim në komision është një votë pro. Unë as kam pasur rezerva për 5 qershorin dhe as nuk kam. Kjo hap rrugë për një kod të ri zgjedhor. Nuk mund ta votojmë paraprakisht kodin pa u bërë ndryshimet kushtetuese.
Nuk mund të bëhet fejesa pas dasme. Do të jetë kusht që numëruesit e vullnetit të qytetarëve në kutitë e votimit duhet të jenë apolitikë”, tha Murrizi. /Opinion.al
