Përfaqësuesi i grupin demokrat parlamentar, Myslim Murrizi, i cili ishte i pranishëm në takimin e sotëm me kryeministrin Rama dhe Taulant Ballën, u shpreh se grupi demokrat që ai përfaqëson nuk do e votoj marrëveshjen e 5 qershorit.
Ai theksoi se në marrëveshjen e sotme me mazhorancën ka lënë shënim se është kundër pikës 1, ku theksohet se më 23 korrik do të votohet në kuvend marrëveshja e 5 qershorit. Edhe deputeti Ralf Gjoni u shpreh se ai do të votojë kundër marrëveshjes së 5 qershorit.
“Kam firmosur që jam kundër një kësaj marrëveshje dhe nuk do votojmë atë marrëveshje. Kemi firmosur për dy pika. Do t’jua vë në dispozicion marrëveshjen që kam firmosur unë. Nëse ju keni marrëveshje tjetër, nuk e di se të kujt, të ferrave apo të bunkerave. Jam dakord me marrëveshjen dhe jam kundër pikës 1 dhe Grupi Demokrat do të votojë kundër. Kam përcjellë vendimin unanim të grupit parlamentar demokrat”, tha Murrizi.
Ndërkohë deputeti Gjoni u shpreh; “Votimi si në çdo vend të votës është individual. Sot ka pasur një dakordësi me mazhorancën për hapjen e listave që kërkon ndryshime kushtetuese. Unë votoj hapjen e listave. Këshillin Politik nuk e kam njohur, kam qenë kundër marrëveshjes së 5 qershorit. Vota ime është pro hapjes së listave, atë për të cilën i kemi premtuar qytetarëve. Unë nuk votoj pro marrëveshjes së 5 qershorit, votoj hapjen e listave”.
Nga ana tjetër Nimet Musai dhe Edmond Stojku thanë se janë dakordësuar me të gjitha pikat e marrëveshjes politike me PS, duke thënë se më 23 korrik do arrihen 84 votat e nevojshme për 5 qershorin, ndërsa më 30 korrik do të votojnë listat e hapura duke e cilësuar një sukses plotësimin e kërkesës së tyre./ Opinion.al
