Zaptimi i plazheve publike dhe betonizimi i rivierës është një nga plagët më të mëdha të bregdetit shqiptar. Një rast i tillë është evidentuar sot në zonën e Shkëmbit të Kavajës ku një 66-vjeçar kishte ndërtuar me beton në rërë.
Para lokalit të shtetasit I. K., Policia e Durrësit, në bashkëpunim me Inspektoratin Kombëtar të Mjedisit dhe Territorit (IKMT) kanë konstatuar se ai kishte zaptuar në mënyrë të paligjshme një sipërfaqe toke, pronë publike plazh, duke e rrethuar me mur dhe plate betoni.
Në vijim të veprimeve, specialistët për Hetimin e Krimeve në Stacionin e Policisë Plazh arrestuan në flagrancë shtetasin I. K., 66 vjeç, banues në Durrës.
Ndërkohë, IKMT ka plotësuar dokumentacionin për prishjen e këtij ndërtimi brenda 5 ditësh.
Materialet i kaluan Prokurorisë së Rrethit Gjyqësor Durrës, për veprime të mëtejshme. /Opinion.al
