Partia Demokratike kërkon të thirren në komisionin e sigurisë ministrja e Mbrojtjes Olta Xhaçka, kreu i Shërbimit Informativ të Ushtrisë Bardhyl Nuredini, kolonel si dhe Shefin e Shtabit të FA-ve, Gjeneral Brigade Bardhyl Kollçaku.
Deputetët demokratë të komisionit të sigurisë pritet t’i dorëzojnë kuvendit një kërkesë për thirrjen në seancë dëgjimore të ministres Xhaçka, kreut të SHIU-t dhe shefit të shtabit për çështjen e oficerit Artur Meçollari, një nga negociatorët e bisedimeve me Greqinë për marrëveshjen e detit.
Burimet thanë se kërkesa po firmoset nga anëtarët e PD të komisionit të sigurisë dhe pritet të depozitohet sot në Kuvend.
Deputet e PD kërkojnë seancë dëgjimore me ministren e mbrojtjes Olta Xhaçka dhe thirrjen e mbledhjes së komisionit të sigurisë ditën e premte më 2 mars në ora 10:00 me këtë rend dite:
1- Seancë dëgjimore me ministren e mbrojtjes me qëllim informimin e anëtarëve të komisionit për praktikën e ndjekur dhe procedurën e plotë të propozimit të Artur Meçollarit si pjesë e grupit negociator për marrëveshjen e detit me Greqinë.
2- Informacione që disponojnë këto autoritete mbi integritetin e këtij individi duke përfshirë arsyet e përjashtimit të tij të mëparshëm nga Forcat e Armatosura.
