A nuk thotë populli: Me gushtin, hyri guna. Pas valës së të nxehtit, kryeqyteti është përfshirë sot pasdite nga reshje shiu dhe era të forta. Ky muaj është shoqëruar me episode ekstreme të motit, duke filluar me valën e të nxehtit, numrin e lartë të tërmeteve dhe duke ardhur tek pasditja e sotme, tek reshjet e shumta të shiut, rrufetë dhe erërat e forta.
Komentues të shumtë në rrjete sociale shkruajnë se muaj gusht është çmendur, pasi luhatjet ekstreme të motit, si stuhi, valë të nxehti dhe tërmete kanë shoqëruar 15-ditëshin e parë të muajit.
Megjithatë, për 15-ditëshin e dytë, meteorologët nuk kanë parashikuar një luhatje të theksuar temperaturash. Ato pritet të jenë mbi 31 gradë celsius. Sipas tyre, vera ka hyrë me temperatura të larta, e mbase ajo do të përngjasojë me verën e vitit 2003 që u karakterizua nga thatësira, pavarësisht reshjeve sporadike të shiut që e kanë shoqëruar këtë muaj herë pas here.
