Pas fitores 2-0 ndaj Skënderbeut Laçi tashmë është ngjitur në krye të renditjes.
Kurbinasit po zhvillojnë një kampionat për t’u admiruar këtë edicion dhe dicka të tillë e tregon edhe vendi i parë në Kategorinë Superiore.
Pozicion që ka kënaqur trajnerin, Shpëtim Duro, i cili pas takimit nuk e fshehu dëshirën për të fituar titullin në fund të sezonit.
“Sigurisht që ka kohë që është lartë, duke patur parasysh muajt e fundit që kemi qenë në pozicione kryesuese. Normalisht që do pretendojmë deri në momentin e fundit”, tha Duro.
Nga ana tjetër, trajneri i Skënderbeut, Migen Memelli u shpreh i zhgënjyer për këtë disfatë, aq më tepër në shtëpi.
“Ajo çfarë kërkova në pushim të pjesës së parë ishte të ruanim ritmin. Të mos bënim gabime dhe ajo çfarë nuk duhej ndodhi. Sido që të jetë do të vazhdojmë sepse kemi akoma një ndeshje të rëndësishme në Fier dhe nuk duhet të humbasim besimin”, u shpreh Memelli.
Javën e ardhshme, Laçi pret Tiranën, ndërsa Skënderbeu sfidon Apoloninë në transfertë.
