Suedia është përfshirë nga moti i keq, me shira të dendur që kanë shkaktuar dëme të mëdha.
Një tren ka dalë nga shënat si pasojë e stuhisë ndërsa tre persona kanë mbetur të lënduar. Meteorologët suedezë dhe norvegjezë lëshuan alarme të kuqe, niveli më i ashpër i paralajmërimit, duke thënë se vendet më të goditura mund të kenë një muaj ose më shumë reshje normale shiu në 24 orë dhe përmbytjet më të këqija në 25 vjet në Norvegji, apo edhe 50 vjet për Suedinë.
Një tren që transportonte më shumë se 100 pasagjerë doli nga shinat në Suedinë lindore, pasi shiu shpërtheu pjesërisht argjinaturën hekurudhore, duke plagosur tre persona të cilët u dërguan në spital, tha policia.
Erërat e forta dhe stuhitë rrëzuan linjat lokale të energjisë dhe ndërprenë disa tragete të Balltikut dhe Detit të Veriut, ndërsa Norvegjia pezulloi disa shërbime të trenave dhe shtyu një numër ndeshjesh futbolli në natyrë.
Kryeministri i Norvegjisë Jonas Gahr Stoere tha se priste që ngjarjet ekstreme të motit të bëhen më të shpeshta.
Autoritetet paralajmëruan më të prekurit që të qëndrojnë larg lumenjve dhe shpateve të pjerrëta dhe të udhëtojnë vetëm kur është rreptësisht e nevojshme. Ata thanë se ekzistonte një rrezik i lartë i dëmtimit të gjerë të pronës pasi reshjet e shiut do të vazhdonin në ditët në vijim.
Danimarka fqinje gjithashtu pa reshje të mëdha shiu dhe dha një alarm të verdhë, një paralajmërim i nivelit më të ulët, ndërsa meteorologët në Finlandë thanë se vendi mund të shihte stuhi të forta më vonë këtë javë./Opinion.al
