Moti i keq ka sjellë edhe aksidentet e para, fatmirësisht pa viktima.
Një aksident në Qafë Thanë dhe një në hyrje të tunelit të Elbasanit, kanë lënë të plagosur 3 persona.
Të dielën paradite në aksin Tiranë- Elbasan, në afërsi të tunelit të Kërrabës dy makina janë përfshirë në një aksident, të cilat janë dëmtuar plotësisht. Burime nga vendngjarja raportojnë për dy të plagosur.
Dyshohet se njëri nga automjetet ka devijuar drejtimin e lëvizjes si pasojë e rrëshqitjes në rrugë.
Në Qafë Thanë një furgon mallrash është përmbysur në rrugë, duke lënduar lehtë shoferin.
Nga aksidenti janë krijuar pak probleme në qarkullim.
Ndërsa Autoriteti Rrugor Shqiptar ka njoftuar se akset janë të kalueshëm, por duhen përdorur zinxhirë.
Për shkak të reshjeve të dendura të dëborës që vazhdojnë ne Qarkun e Korçës, Autoriteti Rrugor Shqiptar dhe Policia Rrugore u bëjnë thirrje drejtuesve të mjeteve të tregojnë kujdes maksimal ndërsa udhëtojnë në akset Korçë-Voskopojë, Korçë-Dardhë dhe Korçë-Kapshtice, thuhet në një njoftim të ARRSH.
