Teksa stuhia “Ciaran” preku Shqipërinë këtë mesditë, reshjet e dendura të shiut dhe era e fortë kanë shkaktuar probleme me energjinë elektrike.
OSHEE bën me dije se dëme ka patur në shtylla, prezencë uji në kabina, stakime në disa linja 35kV dhe n/stacione.
Operatori i Sistemit të Shpërndarjes (OSSH), pjesë e OSHEE ka rritur gatishmërinë në të gjithë vendin, me mjete transporti dhe bazë materiale, duke u përqendruar kryesisht në linjat e tensionit të lartë dhe n/stacione.
Bëhet me dije se grupet e avarive ndodhen në terren dhe po ndërhyjnë në ato zona ku moti ka një përmirësim, pasi në kushte të prezencës së shiut duhet të bëjnë kujdes në zbatim të sigurisë teknike.
Nga raportimi i orës 14:30, rezulton se janë jashtë pune 71 fidera, ku më shumë se 85% prekin abonentë në zonat rurale.
Problematika të furnizimit me energji elektrike ka patur në zonat Fier, Kavajë, Tiranë, Kukës, Koplik, Gjirokastër dhe Vlorë. Probleme ka patur edhe në n/stacione, por falë reagimit në kohë është bërë e mundur rikthimi i energjisë elektrike brenda 10 minutash.
Theksohet se të gjithë linjat e rrjetit elektrik që furnizojnë intitucionet e rëndësisë së veçantë, si spitalet dhe hidrovoret janë në funksion të plotë. Gjithashtu, edhe linjat e tensionit të lartë 35kV ndodhen në kushte optimale.
