Mot i keq, me stuhi të forta shiu, ka përfshirë këto ditë Greqinë, Turqinë dhe Bullgarinë. Deri në këto momente raportohet se të paktën 10 persona kanë humbur jetën si pasojë e kësaj stuhie.
Në Greqi, policia ndaloi trafikun në qytetin e Volosit, në rajonin malor të Pilionit dhe në ishullin turistik Skiathos, pasi shirat rekord shkaktuan të paktën 2 të vdekur dhe mbuluan rrugët.
Në Bullgari, imazhet që vijnë nga zona e Tsarevos tregojnë vërshimet e ujit që lëvizin me shpejtësi, me thellësi të mjaftueshme për të mbuluar automjetet në rrugë. Autoritetet atje, thanë se dy burra dhe një grua kishin humbur jetën. Një prej burrave që thuhet të ketë vdekur, ishte duke punuar në shtëpinë e një nëne dhe vajza që janë ende të zhdukura.
Lumenjtë dolën nga shtrati dhe autoritetet po punojnë për evakuimin e turistëve nga një zonë kampingu në Arapya, jashtë Tsarevo. Një urë u shemb në jug të qytezës dhe ka raportime se tre personat që gjendeshin atje, janë zhdukur. Uji vërshoi edhe në rrugët e qytetit të dytë më të madh të Turqisë, Stambollit duke marrë me vete automjete e duke bllokuar qytetarët.
Dy persona humbën jetën në qytet, teksa përmbytjet i kthyen rrugët në lumenj në disa distrikte veriore, duke përmbytur edhe stacione metroje.
Tre vetë vdiqën dhe 3 të tjerë u shpallën të zhdukur në rajonin e Kirklareli, jo shumë larg kufirit veri-perëndimor me Bullgarinë.
