Shumë qytete në vend po përballen me përmbytje të rrugëve dhe shkëputje të energjisë elektrike për shkak të motit të keq.
Lidhur me situatën ka reaguar Agjencia Kombëtare e Mbrojtjes Civile. Në një postimin në faqen zyrtare në “Facebook” të këtij institucioni theksohet se gjithçka po normalizohet gradualisht.
Sipas këtij institucioni, lumenjtë janë nën nivelin kritik dhe nuk paraqesin asnjë rrezik. Kaskadat e Drinit janë gjithashtu në nivele normale dhe pa asnjë shqetësim.
Më tej Agjencia Kombëtare e Mbrojtjes Civile thotë; “Qendrat e banuara nuk kanë pasur probleme serioze për shkak të reshjeve. Në disa raste të izoluara, pemë të rrëzuara nga era e fortë janë larguar nga strukturat operacionale të emergjencave civile në bashki. Për sa i përket ndërprerjeve të energjisë elektrike për shkak të erës së fortë, ekipet e OSSH-së janë në terren dhe po punojnë për rikthimin e energjisë elektrike. Situata mbetet në monitorim të vazhdueshëm nga Qendra Kombëtare Operacionale e Emergjencave Civil, në bashkëpunim me strukturat e mbrojtjes civile në prefektura dhe bashki”
